उदासीनता
कोठुनि येते मला कळेना
उदासीनता ही ह्र्दयाला
काय बोंचतें तें समजेना
ह्र्दयाच्या अंतह्र्दयाला. १.
येथें नाहीं तेथें नाहीं,
काय पाहिजे मिळवायला?
कुणीकडे हा झुकतो वारा?
हांका मारी जीव कुणाला? २.
मुक्या मनाचे मुके बोल हे
घरें पाडिती पण ह्र्दयाला
तीव्र वेदना करिती, परी ती
दिव्य औषधी कसली त्याला? ३.
- बालकवी
1 comment:
वा! फारच सुंदर कविता नोंदल्या आहेत! छान खजिना मिळाल्यासारखं वाटतय. अशाच अजून खूप वाचायला मिळतील (समीक्षेसह :) ) अशी आशा आहे!
Post a Comment